كنت هعمل حادثة بالعربية و الAbs ملهاش اى لازمة :/

السلام عليكم...
كنت ماشى فى طريق فاضى و كان معايا 3 صحابى فى نيسان صنى 2010 سوبر صالون و فيها Abs طبعا . المهم الطريق كان فاضى فامشيت و جبت ال140 تقريبا و اتفاجئت بمطب قدامى . فدوست على الفرامل على اخرهاااا فالمفروض انها تكلبش فى الارض و تقف . لا دة انا لقيتها بتهدى السرعة بطريقة بطيئة جدااا و كنت داخل على المطب على 85 تقريبا بس الحمد لله نوع المطب اللى هوا مش بيحتاج تهدى اوى . المهم بعديها شميت ريحة شياط كبيرة اوى مشيت شوية و نزلت اشم الريحة ملقتش حاجة !!!!!!
محتاج منكو تفسيييييير علشان انا هتجنن و ناوى ابيعهاا !
شكرا

اظن ان ال absمش مسؤل عن ان العربيه تقف بسرعه
بالعكس بيعمل رد فعل عكسي
للفرامل علشان ماتقفش بسرعه
وتحد من انحرافها يمينا وييسارا

حسيت بالبدال بيتهز تحت رجلك و سمعت طقطقه كده؟ لو اه يبقى ال abs اشتغل
المفروض انه يسمحلك تغير اتجاهك يعنى تفادى حاجه واقفه قدامك فجأه من غير ما العربيه تعوم منك بس ملوش دعوه انك تقف بسرعه ولا لأ

موضوع ان abs يوقف العربية فدة غلط
abs مهمتة انك تفادي عربية لو هاتخبط فية وانت دايس عل الفرامل
لكن مهمة ان العربية تقف في مكانها دي مهمة ebd
ودية اعتقد موجودة في السوبر صالون
ودي بتكلبش العربية للا خر

كلام سليم وهو ده الطبيعى والشياط الى شمتة من تيل الفرامل بس التيل ده نوعيتة مش كويسة

انا كدة لتلخبط
انا فاكر ان abs هو اللي بيخلي العربيةةتكلبش في الارض

abs ملهوش اى علاقه بقوه الفرامل

اقتباس:

---

المشاركة الأصلية كتبت بواسطة mohamed_selim

حسيت بالبدال بيتهز تحت رجلك و سمعت طقطقه كده؟ لو اه يبقى ال abs اشتغل
المفروض انه يسمحلك تغير اتجاهك يعنى تفادى حاجه واقفه قدامك فجأه من غير ما العربيه تعوم منك بس ملوش دعوه انك تقف بسرعه ولا لأ

---

لا محستش بيها انا كنت حاسس بى انى دايس على الاخر و كأن فى زبت على ديسك الفرامل و مش راضية تقف بسرعة

اقتباس:

---

المشاركة الأصلية كتبت بواسطة m.farouk

كلام سليم وهو ده الطبيعى والشياط الى شمتة من تيل الفرامل بس التيل ده نوعيتة مش كويسة

---

دة من التوكيل والله :( و لسا مغيرو من شهر كدة

انا معى الاوبل استرا الجديده التيل الاصلى بوظ الطنابير مع العلم انوا الاصلى وسعروا 950 جنية

حضرتك عندك مشكله فى منظومة الفرامل مش ال abs
ال abs هيشتغل لما العجل يكلبش فى الارض بس العربيه تزحف هتلاقي كان الفرامل بتقفش و تفك فبالتالى زحلقة العربيه بدل ما تقف فى مسافه طويله تقف مسافه قليله بس اللى بتقوله كان العجل موقفش اصلا

لو البدال حجر يبقي الفرامل واخدة هوا
وال abs برضوا بيقلل من مسافة التوقف فقط لو الارض زلقة او فيها رمل عشان العربية متذحفش و ال ebd مش بيكلبش العربية دة بيوزع الفرامل علي الاربع عجلات عشان العربية متعومش لو نصها علي رمل والنص التاني علي اسفلت مثلا
اللي يزود قوة الفرامل نوعية كوتش كويسة وتيل محترم ويكون منظومة الفرامل مظبوطة من زيت وخلافة والاهم مفيهاش هوا

ABS = Brake and Steering

اقتباس:

---

المشاركة الأصلية كتبت بواسطة abdelra0uf

دة من التوكيل والله :( و لسا مغيرو من شهر كدة

---

يبقي مكنش طببع وفرملتك دي طبعتة اهم حاجة ميكونش البدال حججر

اعتقد ان ال abs مشتغلش اصلا لأن لما بيشتغل بتحس بهزة جامدة فى دواسة الفرامل مع صوت طقطقة جامد جدا فى العجل ... والله تعالى اعلى واعلم

مسافات التوقف للسيارات من موقع حكومى بالمملكه المتحده

الموقع

http://www.cyberphysics.co.uk/graphi...hwaycodeSD.png

الفرامل العادية بتوقف العربية فى مسافة أقل من الـــ abs على الأرض الجافة ، والعكس صحيح الــــ abs بيخلى العربية تقف فى أرض زلقة وفى نفس الوقت تقدر توجه العربية لأنه بيمنع انغلاق الفرامل افضل من الفرامل العادية
والحمد لله على سلامة حضرتك

اضغط للدخول


حساب مسافة التوقف و الأنزلاق حسب السرعه

مع الأخذ فى الأعتبار أن المسافه الناتجه غير مضاف عليها المسافه المقطوعه من وقت اتخاذ قرار الفرمله أو ما يطلق عليه " Thinking time "

كلة بيالف من دماغة

الكاوتش اخباره ايه

ABS : Anti- lock Braking System

ABS generally offers improved vehicle control and decreases stopping distances on dry and slippery surfaces for many drivers; however, on loose surfaces like gravel or snow-covered pavement, ABS can significantly increase braking distance, although still improving vehicle control.

بصفة عامه نظام ABS يحسن التحكم فى السياره و يقلل مسافة التوقف على الأرض الجافه و الزلقه و ايضا على الأرض المفككه كالتربة الزلطيه أو المغطاه بالثلوج بستطيع نظام ABS تقليل مسافة التوقف بصورة ملحوظه مع زيادة التحكم بالسياره

المصدر

شوف الكوتش ممكن يكون نعم

انا كنت هعمل حدثه قبل كده بسبب موضوع زي حضرتك بدوس فرامل علي الاخر مفيش شامم ريحه شياط والعربيه ماشيه يدوبك بتهدي وكانت لانسر سوبر اكشن ببص علي الكوتش لقيته ناعم زي الحرير رحت غيرته في سعتها وكل حاجه ظبطت تاني فغالبا كوتش

ده 90% كاوتش ..كاوتش عندك نوعه ايه و عامل كام الف
?

اقتباس:

---

المشاركة الأصلية كتبت بواسطة mo3tazanas

كلة بيالف من دماغة

---

لو سمحت متجمعش كلامي مش تأليف وكلة علمي و صح

الموضوع نسبى وحسب الحاجة اللى قدامك وهقولك ازاى
انت دلوقتى شفت المطب قدامك يعنى بالكتير بينك وبينه 20 متر ، مفيش اي عربية فيكى يا مصر هتقف من 140 في مسافة 20 متر ، ساعتها هتحس انك عايز تقف في المسافة الصغيرة اوى دى ومش عارف فتحس ان الفرامل مالهاش لازمة لان عينك عايزة العربية تقف في الـ 20 متر دول ، ولما تلاقيهم بيخلصوا والعربية ما وقفتش تقول ايه ده فين الفرامل !!!!


بنفس عربيتك دى اطلع تانى على طريق فاضى واماااااان وهات الـ 140 واخبط فرامل مرة واحدة بدون ما يكون في مطب هتحس انها مالهاش حل في الفرامل ووقفت بسرعة جدا ، عايز تحس بقوة الفرملة اكتر ، خلى حد تانى يسوق وخليه يفاجئك بالفرملة ... هتتخض وتلزق في الازاز ......

شوفت الموضوع نسبى ازاى

عربية حضرتك معروف ان فراملها ممتااازه و عن تجربة....ممكن يكون فى مشكله فى الفرامل او زى اما قال أ / السقا

اقتباس:

---

المشاركة الأصلية كتبت بواسطة abdelra0uf

لا محستش بيها انا كنت حاسس بى انى دايس على الاخر و كأن فى زبت على ديسك الفرامل و مش راضية تقف بسرعة

---

اللي بتقوله ده معناة ان التيل ده في الضياع و بيتاثر من السخونة او زي ما بيقولوا بيأزز و الريحة اللي طلعت منه اكبر دليل

هو حضرتك مش المفروض أنك كنت عارض العربية للبيع من فترة وقلت أنك بعتها ؟؟؟؟؟؟؟؟؟؟؟؟؟؟

اقتباس:

---

المشاركة الأصلية كتبت بواسطة دكتور خالد

اعتقد ان ال abs مشتغلش اصلا لأن لما بيشتغل بتحس بهزة جامدة فى دواسة الفرامل مع صوت طقطقة جامد جدا فى العجل ... والله تعالى اعلى واعلم

---

منا معتقدتش لنو اشتغل علشان محستش بحاجة خالص

اقتباس:

---

المشاركة الأصلية كتبت بواسطة spidars

الكاوتش اخباره ايه

---

من ناحية ايه بظبط ؟

اقتباس:

---

المشاركة الأصلية كتبت بواسطة cheetos_892005

ده 90% كاوتش ..كاوتش عندك نوعه ايه و عامل كام الف
?

---

Bridgestone و عامل 44 الف تقريبا

الكاوتش كده خلاص لازم يتغير

على فكرة لو مشكلة كاوتش بتخلى الاي بي اس يشتغل كتير ع الفاضية والمليانة لان التماسك بيبقى اقل فعلى طول العربية عايزة تزحف والاي بي اس يشتغل عشان يمنع الـ wheel lock

يعنى اي فرملة شديدة تلاقي البدال بيتهز تحت رجلك والعربية تعمل صوت كأنه زحف (بس مش زحف على الارض) وطبعا المسافة اطول من لو كان الكاوتش سليم بس اقصر بكتير من لو كان مفيش abs اللى في الحالة دى تلاقى العربية تزحف وتعوم لمسافة كبيرة وممكن تفقد السيطرة عليها تماما (بدون abs )
عامة كاوتش عامل 44 الف كيلو بحاجة للتغيير ومش هو اللى هتستنى منه فرامل وتماسك مثالى

اقتباس:

---

المشاركة الأصلية كتبت بواسطة sanhory

اللي بتقوله ده معناة ان التيل ده في الضياع و بيتاثر من السخونة او زي ما بيقولوا بيأزز و الريحة اللي طلعت منه اكبر دليل

---

طب انا دة لسا جيبو من شهر من التوكيل اعمل ايه ؟؟

اقتباس:

---

المشاركة الأصلية كتبت بواسطة saint2011

هو حضرتك مش المفروض أنك كنت عارض العربية للبيع من فترة وقلت أنك بعتها ؟؟؟؟؟؟؟؟؟؟؟؟؟؟

---

مظبوط يا باشا انا قلت انى بعتها علشان فى ناس كتيير كلمونى كانو عايزنها و انا كنت لغيت فكرة البيع و مصريين انهم يخدوها فا قولت انها اتباعت علشان اريح دماغى
تحياتى

طيب اجربها تانى على نفس السرعة و طريق فاضى ؟؟؟ و ادوس بكل قوتى على الفرامل ؟؟؟

ياه 44 الف ك على الكاوتش كثير قوى

لازم تغيره